Книга глаголемая Козмография (по публикации во Временнике МОИДР)

Книга глаголемая космографія сложена отъ древнихъ философовъ, преведена съ Римскаго языка // Временнике Императорского Московского общества истории и древностей российских. Кн. 16. М., 1853. III. Смесь. С. 1–14.

 

Сходна с текстом «Краткой космографии» (редакция А), опубликованным позднее А. Н. Поповым.

 

(с. 1)

КНИГА ГЛАГОЛЕМАЯ КОЗМОГРАФІЯ, СЛОЖЕНА ОТЪ ДРЕВНИХЪ

ФИЛОСОФОВЪ, ПРЕВЕДЕНА СЪ РИМСКОГО ЯЗЫКА.

 

Предисловіе.

 

     Искони Зиждитель и Богъ создавъ человѣка самовласна и словесна и разсудительна, потомъ же покоривъ ему видимыя твари всяческія и давъ ему животную разумную силу, да творитъ на угожденіе Богу, потомъ же и на промышленіе своему естеству, и да смотритъ полезныя день и нощь, и о томъ да восхвалятъ благаго хитреца Бога. Понеже даны суть изначала каяждому отъ него языку хитрость: Еллинномъ словесное осмочастіе, еже суть риторское витійство, Персомъ же и Вавилоняномъ звѣздословіе, небесный бѣгъ, Египтяномъ же землемѣрія, еже есть козмографія. По нѣкоему богословцу премудрому реченное, еже состоится философія седьмію мудростьми: 1-я. Мудрость многосложное арфографіе, тако же сложное и простое; 2-я. речѣточецъ, еже суть витійское прецирательное толкованіе; 3-я. яже выше всѣхъ богословное; 4-я. небоокружная; 5-я. лекарская, оже еже есть лѣкарство лѣчбы; 6-я діометрикія, оже есть числительная и скоропамятная; 8-я. яже святая писанія толковати и благоглаголати и писати иже спасти душу свою, еже отъ древнихъ Философъ зовется любомудрія, сіи рѣчь память смерти. Сихъ же сло­ весъ дозде, коснемъ же ся предлежащему.

     Сія же книга козмографія из давныхъ лѣтъ составлена, еже есть писаніе всего свѣта, трехъ частей сыновъ Ноевыхъ: Сима, Хама и Афета. Якоже пишетъ Боговидѣцъ Моисей во своей книгѣ въ миротвореніи, еже есть въ бытіи: раздѣлиша сынове Ноеви всю землю на три части.

     По раздѣленіи же писаша древній Ѳилѳсофи, Симову часть перваго сына положиша восточную и нарекоша имянемъ ея Азія, конецъ же ея достигаетъ до восточного моря до Макаритцкаго острова, еже близъ блаженного рая, другій же конецъ до Фарсійскаго моря и до Чермнаго, третія же страна раздѣляетъ отъ Китайскаго царства и до земли звѣрообразныхъ людей, еже есть Сибирь, и до Хвалынскаго моря.

     Вторая же часть втораго сына Хама положиша полуденную, и назваша имянемъ ея Африка, протязается же отъ Ядъсирскаго языка до Чермнаго моря и до Ефіопскаго моря и до Окіянъскія пучины.

     Третьяго же сына Афета третію часть положпша западную и с полунощіемъ, и назваша имянемъ ея Европія, отъ средняго моря да до великаго Окіяна, съ другую же страну до Фряжьскаго моря, с третюжъ страну до Мурманского студеного моря, еже есть называютъ Соловецкая пучина. || (с. 2)

     Кругомъ же всѣхъ тѣхъ трехъ частей обходитъ великое море зовомое Окіянъ; и тѣ убо три части всего свѣта земли на водѣ яко же на блюдѣ простерты силою преблагаго Творца. И въ тѣхъ же въселенныя частехъ земли страны великія государства и языцы различные овіи грамотпіи, овіи же и безъкнижные, иже на послѣди вся подробну скажемъ.

     Послѣже сего много лѣтъ спустя въ недавныхъ временахъ Латынскіе фи­лософи обрели на западѣ на морѣ окіянѣ вдоль по пучинѣ многія островы и различные, овіи же людніи и богатіи , овиже безчеловѣчыи, и нарѣкоша тѣ острови имянемъ Америка, и назваша ихъ четвертую часть новую землю, и положити ихъ къ тѣмъ же тремъ частямъ козмографіи. Всея же земли въ тѣхъ частяхъ каяждо страну и землю и царства и королевства и различные, и что ихъ богатьство и пространство, вѣры жъ и нравы, многолюдъство же, и храбрость, и ученія, и мудрость вся подлинно да скажемъ.

     1. Земля, Италія въ части Европіи на западѣ Афетова меншаго сына Ноева, отъ моря лежитъ Виницейскаго понеже и Виницея въ тойже странѣ обдержится. Зачата же бысть Италіусомъ храбрымъ отъ Троянского колѣна и языка, протязается же до Римскаго Цесарства и до Испанскаго Королевства. Италія же множество острововъ имать въ своей области: островы Сардія и Сикилія и Мядіаломъ; вѣру же имутъ отъ проповѣди апостольскія благочестія; грады же и въ нихъ епископы и монастыри, якоже звѣзды въ небеси. Прежде же Римскаго града ту бяше королевство, по томъ же въкупе подъ Римского Цесаря державою бысть, храбрыхъ же людей воинскихъ не много бяше въ нихъ, но больше купецкихъ, градыже камены и земля плодовита скотомъ и овощемъ, ученіемъ же снискательни къ мудрости, златыя жъ и серебреныя сосуды имать много; нынѣ же неистовства ради своего въпадше въ римскую ересь и нарицаются они вѣрою Папеженя, нынѣ же бяше подъ римскимъ правленіемъ.

     2. Земля Греческая, въ ней же бе и Царьградъ, изначала зовется Византія, отъ нѣкоего мужа прозвася Еллина родомъ отъ восточныхъ Елладъ, сіи же отъ него нарицашесь Грецы отъ Греческихъ Царей; нарицаются же они седмохолми; пространствомъ же отъ Бѣлаго моря до Серпскія державы, з другую же

страну до Угорьскія съ третьею же до Цысарскіе земли; Царь же градъ созданъ отъ Римскаго Цесаря Константина, свое же ему и имя именовалъ, и преселися отъ Римского града въ Царьградъ и вся своя синаторіи и вельможа съ собою приведѣ, купеческихъ людей собра изо многихъ странъ и градовъ богатыхъ и славныхъ, церкви же и грады и полаты царскія и торги толико свѣтло украси, яко и во всѣй всѣленней другій такій градъ необретается; и отъ того Констянтина въвелися Цари Греческіе, ту престолъ содержаніе и многія подъ собою страны и царства имеяше, такожъ славою и мудростію и храбрымъ воинствомъ зѣло цвѣтяше; благочестіемъ же вѣру седьми соборы утвержену отецъ , нетокмо преже храняше, но и нынѣ даже до || (с. 3) конца терпеливно стражутъ. Не в давнихъ лѣтехъ бусурманомъ Турскимъ взяти быша ради своея гордости и небратолюбія; нынѣже хотя и обладаеми Турскою державою нежножествомъ людей, и яко песокъ уплодишася, но безооружіемъ и страхомъ противитися не дерзаютъ, но епископы же и монастыря и церкви ничемъ же вреждени суть, но тяжскими данми смирены суть.

     3. Королевство Сербское отъ Чермнаго моря простираются до Угорскаго, въкупе же съ нимъ и Воложское державство , имать же во своихъ предѣлехъ и святую гору Афоніискую, въ ней же и донынѣ въ монастыряхъ и въ пустыняхъ 12000 черньцовъ. Издавна же Сербское владычество благочестивое, нынѣже подлежитъ подъ Турскою данью, королевства въ себѣ не имать. Толика плодовита хлѣбомъ и овощемъ различнымъ, что въ той въ всей Европіи таково изобильство необрѣтается, вѣру же свою крѣпку хранятъ и до сего дни. Людіе же в нихъ благообразны и благонравны, мало жъ не вси купецкія, воинскихъ же мало.

     4. Царьство Болгарское, и съ нимъ въкупе подлежитъ Козары, пространство же имать невелико отъ Грецкія земли до Чешьскія, людіе же зѣло храбры и большая половина воинскихъ; имать же въ себѣ великую рѣку Дунай и об ней стоятъ и противятся съ недруги, рѣка же та быстра и широка и всѣмъ плодовита, имать же в себѣ поперегъ себя 5 верстъ, идетъ въ Черное море, вѣра жъ Болгарьская, въкупе же со Словяны приняли крещеніе, нынѣ же мало благочестія обретается, иновѣрныхъ ради страха.

     5. Страна Угорская и Чешьская Королевство, изо многихъ лѣтъ Крали были самовластные, и нарицалися златые отоцы, что златые руды куплютъ множествомъ, и златыя Угорскія идутъ во всѣ земли; людей же обоихъ много и воинскихъ и торговыхъ; нынѣ же осилѣемы и отъ Турскаго Царя и отъ отъ Польского Короля, потому что межь ихъ Государства стоятъ. Земля же плодовита овощемъ и виноградомъ и хлѣбомъ; вѣра же разная въ нихъ Греческая и Латинская и Нѣмецкая, человѣцы же велицы и сильны, и прилежатъ яденію и піянству и играмъ всякимъ.

     6. Страна Корсунская подлѣ Черного моря, нынѣже словетъ царство Крымское, понеже Агаряне осильствоваху тѣми грады, благочестіе въ нихъ разорили, и простираются тѣ Крымскіе варвары до Пятигорскихъ Черкасъ, а тѣ Черкасы Агарянскій же языкъ, с ними въкупѣ кочуютъ и живутъ подлѣ Хвалынского моря, и на войны въкупе другъ со другомъ ѣздятъ, и вѣра в нихъ проклятая Бахметова, и покоренъ Царь Крымскій Царю Турскому, что ихъ языкъ и вѣра одна проклятая Бохметова, понеже той Турскій Царь Агарянскаго колѣна силенъ же бо есть и оружіемъ и многолюденъ, того ради и появъ славный Царьградъ. Нравы же ихъ пьянства многова отвращаются, славы жъ и тѣлеснымъ же сквернамъ рукодѣльнымъ ризамъ златымъ и шелковымъ и всякими понявами цвѣтными. || (с. 4)

     7. Цесарство державы Римскіе въ той же въ Европіи части сына Ноева мешпаго Афета. Зачатъ же ся славный Римскій градъ отъ дву родныхъ братовъ Рома и Ромила, иже утекли отъ Тройского разоренія и во свое имя назваша градъ Римъ, во дни Царя Давыда, и толико возвысися и умножися людьми, яко много лѣтъ владѣя всѣми странами и царствы вселенныя и паче всѣхъ прославися и обогативъ; яже прія первіе всѣхъ благочестіе отъ Петра и Павла, и отъ ихъ стола первенствуя Папы нарицашеся, всѣми Патріархи и Епископы старѣйшинствуя много лѣтъ. Не в давныхъ лѣтехъ вѣру умыслили Латинскую и благочестіе седьми соборъ отложили и составиша осьмый соборъ слабости ради своея ереси злоумышленіемъ, и тѣмъ многія страны великія себѣ прельстили, пространьство же ихъ отъ

моря Виницейского; страна же не сильно широтою велика, но зѣло многолюдна, грады каменныя тверды; человѣцы же мудры и многоучительны, много и воинскихъ и торговыхъ; плодовита же скотомъ и хлѣбомъ; честно же Цесарьство Римьское во всей Европіи до нынѣ почитается и многія подъ собою покорны страны и грады.

     8. Королевство земли Шпанскіе, издавна славна и бяше та земля подъ Римскою державою и благочестіемъ сіяше же, нынѣ же свое Королевство богатѣе и славнѣе перваго, потому что обрели новые островы со златою и сребряною рудою, и многи узорочья, и отъ того возвеличилися и многи острова и грады тверды подъ себя подъкорили, и стоятъ противъ Турскаго царя и тѣснятъ крѣпко въмѣстѣ съ Римскимъ, по вся годы у нихъ война не умолкаетъ. Вѣра же в нихъ нынѣ ово Папежъская латынская, ово же Лютерская; человѣцы же мудри лѣкарствомъ дохтурскимъ и звѣздочестію, много же и храбрыхъ людей и купецкихъ. Земля плодовита виномъ краснымъ и пряннымъ зеліемъ и сахаромъ.

     9. Земля Француское Королевство бывало крещена отъ Святыхъ Апостолъ, нынѣ же вѣры благочестивыя заблудили въ злую Калвинскую и Люторскую, древнихъ же лѣтъ богатѣе и славнѣе бысть нынѣ, что и тѣ обрѣли острови богатіи на морѣ с каменіемъ драгимъ и бисеромъ; земля же невельми пространна, и языкъ свой, и люди воинскіе зѣло храбры, и во всей Европіи Афетовѣ части храбрѣе ихъ силою необретается, и наймуются битися по многимъ государствамъ, и отъ того честніи и богатіи, много жъ и богатыхъ купецкихъ людей, изобильна же виномъ и овощемъ.

     10. Земля Германія и языкъ Германскій славенъ во всѣхъ Нѣмцахъ, любима же и крещена была отъ Святаго Апостола Павла, нынѣ же вѣрою заблудила въ Нѣмецкую розную ересь, и Кроля у нихъ нѣтъ, разные Арцыки, сирѣчь Великое Княженіе; предѣлъ же своея земли имутъ отъ Нѣмецкаго моря и до Фряжьского и до Пружьского острова, и людей больши купецкихъ нежели воинскихъ, изо всѣхъ Нѣмецкихъ земель земля людна и плодовита, || (с. 5) грады каменны и палаты. Человѣцы же ласковы и смирены, и слабы ко піянству и къ покою тѣлесному.

     11. Королевство Польское и Великое Княжество Литовское въкупѣ под одною державою, издавна были крещены благочестіемъ же сіяли, нынѣ же во многихъ градехъ благочестивый суть, а та вѣра Лятцкая папежская, языкъ же имутъ Словенскій; пространство же имѣютъ не мало отъ Римскіе державы до Русскіе земли и отъ Чернаго моря до Фряжскаго моря; грады же имѣютъ каменные тверды и древяныя; плодовита же зѣло скотомъ и овощемъ и медомъ; человѣцы же величавы и гордый обманьчивы, ученію снискательны мудростемъ всякимъ, и къ войнѣ к ратямъ готовы и охочи и оружны; подданные же у нихъ господей своихъ не слушаютъ, поволно живутъ и безстрашны, платье же носятъ зѣло цвѣтно, и слабы къ ядѣнію и къ піянству и всякимъ сластемъ.

     12. Царство Россійское державы, сперва же Великіе Князи нарицахуся многихъ великихъ градовъ, и бысть крещена отъ Великаго Князя Владимира Кіевскаго, даже и нынѣ благочестива вѣра цвѣтетъ, состоится седьмію соборъ Святыхъ Отецъ, и нарицашеся издавна Великая Скифія и Литовская земля с нею же въкупе. Не въ давныхъ же временахъ Кіевъ и Литовская земля отъдѣлися, въ та же мѣста Руской области покорны учинишась.

     13. Царство Казанское и Астраханское, иже нарицашесь златая Орда, к томуже иные Татарскіе языцы, Черемиса, и Мордва Самоядь и Лопари, и страна Сибирская; и простирается Московская страна отъ моря Хвалинскаго до моря Соловецкаго, еже есть великаго моря Окіяна. Нынѣ же Россійскіе цари единъ самодержьствустъ во всей земли, во градѣхъ зѣло благолѣпіемъ красятся и чюднымъ знаменіемъ и канбаны, еже есть колокола, и во всей Европіи подобныя тоя земли несть. Человѣцы же сановиты брадами и платьемъ, нравы же непостоятельны и корысти желательны, много же и воинскихъ людей и купеческихъ богатыхъ, родится хлѣба и меду много и рыбъ различныхъ множество, понеже великія рѣки проходятъ Волга, иже раздѣляетъ Татарскій языкъ со Словенскимъ, и Двина иже входитъ въ море Соловецкое, море же то зѣло рыболовно, стоитъ же и монастырь на немъ Соловки, градъ же дикова синева и зеленова камени, иноковъ же обѣльцовъ и гостей множество.

     14. Королевство Свицкое, земля невелика, стоятъ же грады тверды ка­мены по губамъ морскимъ и по озеромъ, такихъ же градовъ твердыхъ во многихъ странахъ не обретается, Нѣмцы же тоя земли храбры ко всякимъ воинскимъ дѣломъ и смышленны , и много наймуются битися по чюжимъ Государствамъ, вѣра же люторская ересь, изообильна же скотомъ и рыбою, слабы ко піянству и ко всякимъ играмъ. || (с.  6)

     15. Земля Датская, Королевство издавна Римскихъ царей роду, стоитъ близь моря Окіяна, и по губамъ грады камены и полаты, много же воинскихъ людей; Нѣмцы жъ тѣ мудры х дохторству и смышлены ко всему; земля жъ пространствомъ не добре велика; вѣра же Люторская и Усмицкая; изобильна же скотомъ и овощемъ и дикими звѣри различными.

     16. Островы Британскіе нынѣ же нарицаются Кролевство Аглинское и Шкотское, вѣра же прежде бывала благочестивая, крещены отъ царя Константина, нынѣ же ересь Люторская и Евагилитцкая объятъ, войны же у тѣхъ Королевствъ ни с кѣмъ не бываетъ, что однѣ на островахъ живутъ; и въ долготу ихъ толико пятьсотъ верстъ, грады же каменыя и селы людны, много купеческихъ людей, а воинскихъ мало; человѣцы же ко всѣмъ мудры и смышлены, и к лечбамъ дохтуроваты; изобильно же овощемъ и виномъ и скотомъ и рыбами; а лежитъ въ части сей же Европіи Афетовѣ.

     17. Островы Прускія и Барабанскія и Галанскія, въ нихъ же державство или Княжество; Нѣмцы же тѣ купеческія богатые, а не много воинскихъ, а пространствомъ невелики, толко зѣло людны и грады камены; вѣра же ересь Люторская и Евангилитцкая, ученіемъ же к рукодѣлію хитры; златаго дѣла и серебрянаго и бисера много, и руды серебряной и мѣдной и оловяной много, изобильно же скотомъ и овощемъ и виномъ; стоитъ же въ той же Европіи части по морю Окіяну. И здѣ конецъ Афетовѣ части западной и полунощной.

     18. Земля Сибирь нарицаемая звѣрообразныхъ и дикихъ людей, по тому что живутъ по лѣсамъ и по рѣкамъ великимъ, и питаются звѣремъ и рыбою кромѣ хлѣба, ѣдятъ кровавое и сырое, вѣры же и грамоты неимать, добываютъ же и продаютъ драгіе звѣри соболи и куницы и бобры и лисицы и бѣлки множество, простирается широко и долго, и под данію державы Московское Царя.

     Въ части же лежатъ Азіи во жребіи Симовѣ.

     19. Земля Нагай и Колъмыковъ, кочевные Князи, и преходятъ съ мѣста на мѣсто, и питаются скотомъ и держатъ множество всякихъ животинъ, а хлѣба нѣсть ни овоща всякаго ни градовъ, добываются жъ коннымъ боемъ, вѣра же Татарская а не грамотная, земля же у нихъ аще и пространна, но пуста.

     20. Земля Грузинская, изначала же нарицашеся царство Иверское, стоитъ подле Хвалимскаго моря, вѣра же издавна была благочестивая отъ Царя Константина, нынѣ же Царя о себѣ неимутъ, вѣры разныя, потому что осилѣлъ Шахъ Кизилъбашскій и разорилъ и даньми тяжкими покорилъ, изобильна овощемъ и хлѣбомъ и скотомъ и виномъ.

     21 . Земля Армейская, изначала особѣ было царство пространно и богато грады и людьми и овощемъ и скотомъ, нынѣ же подъ державою порабощено Кизильбашскимъ Царемъ, вѣры же в нихъ розные смѣшалися ереси благоче||(с.7)стивыхъ же зѣло мало обретается, нынѣ же и до конца заблудили, люди же в нихъ торговые богатые, а воинскихъ нѣсть, шолку и бумаги много.

     22. Земля Кизилъбашская, нынѣ же стало царство славно, въ той же части Симовѣ, иже нарицаются Шахъ, потому что овладѣлъ великимъ царствомъ Перситскимъ и Вавилономъ и Мидцкимъ; что тѣ нынѣ страны опустѣли, вѣра же Татарская в нихъ, имѣетъ тотъ Шахъ всегда бой с Турскимъ Царемъ, понежъ человѣцы храбры къ войску и легки; и богатъ зѣло златомъ златокованными ризами и шелковыми поставами и бумажными ризами разныхъ цвѣтъ; нравы же крѣпки и отъ піянства воздержательны, а къ тѣлеснымъ похотемъ слабы.

     23. Земля Перская издавна многонародная и царство славное, власть имѣяше надъ вселенною, туже былъ Навходносоръ Царь и Даріи Перскій, и въ томъ бѣ градъ Вавилонъ и Мицкое царство; человѣцы же къ воинству щательпы и легки, яко и дѣвицы на ратехъ воспріемлютъ мужескую крѣпость, нынѣ же тѣ страны подъ Кизилъбашскимъ Царемъ; нравы же ко звѣздочестію прилежатъ и къ волхвованію, и вѣруютъ в огнь и въ солнце и древу.

     24. Земля Ѳарсія, издавна баше Царіе въ нихъ, и земля ихъ подлѣ моря и по островамъ, изобильно златомъ и серебромъ и мѣдію и каменіемъ драгимъ и бисеромъ, хлѣба же и овощей въ тѣхъ странахъ мало, горячества ради; вѣра же Перская и Мидитцкая проклятая.

     25. Страна Индея великая, издавна царство славное, пространство же имѣетъ много и всюду зѣло широка, градовъ и селъ безчисленно, даже про­ стирается и до Китайскаго царства и з другую страну и до моря восточного; вѣра же в нихъ: служатъ солнцу и звѣздамъ и огню, бывало же немного времени в нихъ и благочестіе, а нынѣ паки заблудили; изообильно же каменіемъ драгимъ и бисеромъ, и сладкимъ кореніемъ и благоуханіемъ; нравы же в нихъ варварскіе, но піянства многаго отвращаются, и градъ у нихъ Хойбоя, 300 верстъ.

     26. Царство Индея малая, лежитъ подлѣ моря восточнаго, владѣютъ же и островами морскими многими, подъ данію же лежитъ, покорны Царю великія Индеи, изобильно же поморскими узорочьи всякими.

     27. Страна Ефіопская, издавна царство славное и мнолюдное, вѣры же бысть немного благочестивыя, нынѣже вся до копца изошла и нравы; стоитъ же въ той же части Азіи Симовѣ жребіи, изобильно же златомъ и сребромъ и многими драгими мастьми и кореніемъ сладкимъ, нынѣже опустѣла отъ Индейскаго царя.

     28. Царство Арапское черное, вѣра и нравы Ефіопскіе же, служатъ солнцу и огню и звѣздочетію, идетъ же отъ нихъ златыя во всѣ земли что добро и красно, и родится у нихъ пшено и перецъ и гвоздика и пряныя зелья. || (с. 8)

     29. Земля Малацыя богатая, лежитъ край моря восточного, человѣцы же в нихъ диковаты и страшливы, и войны ни с кемъ неимѣютъ, что удалѣли отъ всѣхъ странъ въ Симовѣ же части, питаются же овощемъ различнымъ и кореніемъ сладкимъ, вѣра же кумирская заблуждшая, каменія же и бисера драгаго больши всѣхъ земель;

     30. Земля Евилацкая пространна и велика, исперва бывали у нихъ Царіе, нынѣже самовластно пребываютъ, и рѣками великими обходимо, и отъ того питаются, хлѣба же мало, вѣра же и нравы Ефіопскія земли, и войны унихъ мало, что покоряются многимъ Царемъ.

     31. Страна Рахматы нагія подъ самымъ востокомъ солнцу, и Царя имѣютъ у собя, вѣруютъ же на небо къ богу и оне крещены, житіе же ихъ таково: одѣваются же листвіемъ древянымъ садовнымъ и отъ того овощемъ питаются, и жены имѣютъ, а ризъ и скота и хлѣба не имѣютъ, ни градовъ ни войны не имѣютъ же.

     32. Земля Схи . . . велика и пространна, питаются овощемъ и звѣрми Польскими, а служатъ солнцу и звѣздамъ и огню, нравы же в нихъ Индейскія земли, но въ части Азіи Симовѣ жребіи, хлѣба же нѣсть и плодовыхъ . . . мало хлѣбныхъ;

     33. Да тутъ же подъ востокомъ солнца есть мѣсто, гдѣ исходятъ великія четыре рѣки райскія, а искони созданія міра устыма шли изъ самаго едемского рая, якоже и глаголетъ в миротворной книгѣ въ бытіи, что сотвори Богъ четыре рѣки великія напаяти едемъ и рай, имя первой рѣцѣ Тигръ, второй имя Ефратъ, третей имя Нилъ, четвертой имя и Ѳисонъ. Нынѣже по тѣмъ рѣкамъ доитти до блаженнаго рая невозможно, потому что рай блаженный отъ земли отдаленъ бысть по преступленіи Адамовѣ, только онъ на земли жъ стоитъ, а тѣ рѣки ходъ свой подлѣ землю скрыли, и кругъ того рая и едема обътекли морскія пучины, рѣки же тѣ исходятъ во многія страны напояти лице земли, широтою же несильно велики онѣ, но глубоки и быстры и всякими плоды и рыбами изобильно и златомъ и серебромъ.

     34. Горы стеклянные, 2000 верстъ подъ востокомъ солнца, и тутъ человѣкомъ нѣсть жилища, много же колванъ, сіи рѣчь великихъ змѣй крылатыхъ; и тутъ ходилъ до тѣхъ горъ Царь храбрый Александръ Макидонскій и возвратись.

     35. Царство Китайское между востоки и полунощемъ въ Симовѣ же части, стоитъ на углу отъ моря Окіяна, и ѣздятъ к нему торговати Нѣмцы въ коробляхъ, понеже богатъ всякими товары шелки и бумагою и бумажными цвѣтными понявами и соболями и куницами и лисицами, велбудъ же и скота много, хлѣба же мало; грады же имѣютъ каменныя, вѣра жа в нихъ Татарская и Арменьская, войны же неимѣютъ ни скѣмъ, потому что удалѣло отъ странъ. || (с. 9)

     36. Страна многихъ князей и кочевные орды, вѣра же Татарская и Перская, лошадей же и скота и вельблюдовъ много, дѣлаютъ же ризы шелковые и бумажные, и воюются межъ собя безпрестано, а хлѣба мало имѣютъ и овоща, что приходили степи голые отъ солнца жары великія,

     37. Въ той же части Азіи въ Симовѣ жребіи острови на восточномъ морѣ, первый Макаридцкіи близь блаженнаго рая, потому близь глаголютъ; что зале­ таютъ отътуду птицы райскіе гамаюнъ и финикъ, и благоуханіе износятъ чудное.

     38. Вторый же островъ подъ востокомъ, живутъ василиски, лице и волосы дѣвичьи, и отъ пупа хоботъ зміевъ, крылаты. Близь же того инъ островъ, в немъ же родится червь златый и песокъ златый;

     39. Островъ на восточномъ же морѣ человѣцы дикіе, власы и ногты лвовы. Есть же и близь того еще островъ, въ немъ же человѣцы песьи главы , человѣцы же велицы и страшни зракомъ. Есть же иные островы многи, въ нихъ же каменіе драгое и бисеръ великъ зѣло, яко одна жемчюжина тянетъ близь полупуда. Здѣ же конецъ Симову жребію части Азіи.

     40. Скажемъ же и о третіей части Хамова жребія Африкѣ.

     41. Земля Асирія великая въ части въ Хамовѣ, издавна же царство сильное, а воинства и оружія премного; вѣра же овіи грады благочестивая, овіи же розныхъ ересей. Въ ней же бѣ градъ великая Антіохія многолюдна и украшена, нынѣ же опустѣла та страна отъ даней Турскихъ, понеже нынѣ подъ Турскою державою, плодовита же зѣло овощемъ и масличіемъ и виноградомъ.

     42. Страна Палистинская, въ ней же градъ Іерусалимъ боголюбивый, иже созданъ издавна, Царь отецъ Мелхиседековъ царствова, потомъ же и Саулъ Царь, и Давидъ возлюби его паче всѣхъ, Соломонъ же Царь толико его украси и святая святыхъ воздвиже, что толикія красоты издавна не обретатеся во вселенней, и вси Израилевы и Іудейскіе Цари ту царствоваша. Палестина же земля округъ его со многими грады зѣло плодовита хлѣбомъ и виномъ и ско­ томъ; человѣцы же Израильтяна, нынѣже Жидовя, злонравны и горды, разсѣяны во вся страны. Во Іерусалимѣ же живутъ розные языцы и розные вѣры благочестивая и еретическая; подъ данію же в покореніи Турского Царя, Патріярхъ же и монастыри и донынѣ есть въ вѣрѣ.

     43. Земля Еллинская, въ ней жъ градъ мудрые Афины и Елладское царство и Макидонское, въ ней же бысть Александръ царь Макидонской; человѣцы же зѣло мудры и къ философію учительны; страна и земля пространна, стоитъ же въ Хамовѣ жребіи; вѣры же розные и благочестивая и еретическая , плодовита же всякими овощи и медомъ и хлѣбомъ , покорны же подъ данію Турского Царя, и Царя у нихъ нѣсть издавна. || (с. 10)

     44. Страна Аравія великая, и горы въ ней и холми высокія и пустыни непроходныя, в ней же и Синайская гора, что отъ Бога тутъ Моисей, монастыри и пустынницы многія, иноковъ 7000, даютъ же дань Турскому Царю, питаются же ѳиниками и смоквіемъ и масличіемъ. Аравляне же вѣрою Срацынскою злою, вѣрныхъ же всѣхъ побиваютъ на путехъ, градовъ же крѣпкихъ и ученія мудраго неимѣютъ, яко скоты пасутся, земля же пространна и овощна.

     45. Страна Ѳилистимія и Еломитія, на край моря стоитъ Чермнаго и до Фарсійского, вѣры же в нихъ розные, нравы же и обычьи варварскіе, подъ данію Турского Царя, земля же скотна и овощна и пространна и долга.

     46. Земля Египецкая отъ Чермнаго моря и по среднему морю стоитъ, издав­ на царство славное и гордое, иже Ѳараоны нарицашеся, иже поработили сыны Израилевы, Божіимъ судомъ въ Черномъ мори потопишася Египтяне. Есть же в ней градъ великая Александрея, тутъ и патріархъ и вѣрныхъ людей множество. Египтяне жъ издавна къ мудрости тщательны и землемѣрцы и звѣздочетцы, вѣры же в нихъ различные. И преже еще опустѣлъ отъ Римскихъ Царей, нынѣже подъ данію въ покореніи Турского Царя, изобильна же мясами и рыбами и хлѣбомъ всякимъ.

     47. Страна Вифаитцкая, издавна бывало царство, нынѣжъ под рукою Турскою Царя и опустѣла отъ Ефіопскихъ Царей, земля же невельми пространна, но зѣло плодовита хлѣбомъ и овощемъ и масличіемъ, и укращена монастырями и пустынями, в нихъ же множество инокъ спасаются.

     48. Страна Еѳіопія, явися пространна и плодовита зѣло виноградомъ и хлѣбомъ, и таковая по вселенной не обретается родима, вѣры же в нихъ раз­ личные, монастырей же и отходныхъ пустынниковъ премножае всѣхъ, и толико иноковъ яко звѣзды въ небеси, подъ рукою же въ покоренія Туского Царя, бѣльцы же нелюдно;

     49. Страна вторая Ефіопія полуденная пространа и велика, Цари же въ ней розны, маложе благочестивыхъ крестіянъ, нравы же и вѣры разныхъ вѣръ, И подъ тоюжъ землею и Муринская земля, иже вся страна южная нарицашеся; и сперва даже и при Соломонѣ царѣ приде къ нему царица южеска Мимъ, а слышати премудрость его и храма святая святыхъ узрѣти, ея же узрѣвъ и удивися зѣло, пророчествова многія вещи, богатство жъ дастъ Соломону много.

     50. Королевство Папаяна, земля велика и пространна на мысу великого моря, вѣраже въ ней евангилитцкая еретическая, толикоже горды имѣютъ нравы, аще пріѣзжіе гости къ ихъ вѣрѣ неучнутъ вѣровати, и они у нихъ на главахъ положатъ бумажныя шлыки зажигаютъ, и отъ того изгораютъ, изобильна же плодомъ всякимъ и богата. || (с. 11)

     51. Земля Ѳиническая и Амморія, ся пространная и широкая, изообильна же плодомъ всякимъ и богата звѣрьми и рыбами, понеже близъ моря и рѣкъ великихъ, изобильноже хлѣбомъ и всякими плоды, вѣраже смѣстная благочестивая и еретическая, человѣцы же невоинскія но купецкія, и владѣютъ ими овіи страны варвары. Съ другую сторону Ефіопляне, идутъ же отъ нихъ пряные зелія: корица, и гвоздика, и инбирь, и мушкатъ, и благовонныя араматы и сахары.

     52. Земля Срацынская, и вѣра и языкъ бусурманскій, человѣцы же больши воинскихъ а меньші купеческихъ, бѣгаютъ же въ коробляхъ по морямъ и громятъ торговыхъ людей, такожъ и воююще по странамъ, и тѣмъ корысти добываютъ. Преже сего Турскій Царь ту бе и жилище имѣяше, понеже едино ихъ колѣно, нынѣжъ взятъ Царьградъ.

     53. Земля Варварія, сіи рѣчь Татарія, вѣра и языкъ бусурманскіи, нравы и человѣцы яко Срациньскіи, такоже и Князи в нихъ властуютъ, оружны же и ратны, и коньми и кораблями бои чинятъ, и выѣзжаютъ на великое море Океянъ, и многія корабли громятъ, имѣютъ у собя многія полоняники многихъ ордъ, нравы же жестосердіи, ярыжекъ имѣютъ у собя много, и слабы къ тѣлеснымъ сквернамъ, земля же изобильна всякими плоды.

     54. Земля Ундольскій языкъ, лежитъ подлѣ великого моря Окіана, протянулася же до Ефіопъскія пучины, человѣцы же самовластны Царя надъ собою не имѣютъ, нравы же и обычаи имѣютъ Нѣмецкихъ людей, и покорены Цесарю и Папѣ Римскому, Ивангилитцкая ересь и Калвинская и прочихъ ересей.

     55. Царство Магдянское, стоитъ на единомъ острову на море полуденномъ, войны ни с кѣмъ неимѣютъ, всѣ у нихъ купецкія нравы, и обычай в нихъ купецкихъ людей, понеже отъ роду Фараонова бяху, градовъ же неимѣютъ и крѣпостей, понеже обліяна великимъ моремъ и отъ иныхъ земель удалено; вѣра же у нихъ: служатъ солнцу и огню и прилежатъ звѣздочестію и волхвованію; пространно же и долго.

     56. Бѣже островъ человѣкоядьцы нарицаемыя на Ѳарсійскомъ морѣ, человѣческія и всякихъ скотовъ и звѣрей плоти вкушаютъ и кровь пьюіъ, диви же и злонравны, вѣра же кумирская бяше. Есть же и ближъ того другій островъ, иже родится корица и гвоздика и инбирь; есть же и иныя островы малы, иже человѣкъ нѣсть.

     57. Да въ тойже части Европіи по другую страну на Понтійскомъ морѣ, есть островъ Кипрски, сорокъ градовъ имать на себѣ, толико людей, изообильно же всѣмъ, вѣры же розные благовѣрная и еречитеская, покоренъ же тотъ островъ и подъ данію Папы Римского. Есть же близь того Киликія островъ люденъ и плодовитъ. || (с. 12)

     58. Да на томъ же морѣ есть островъ Критцкій, имѣетъ на себѣ двадцать пять градовъ, языкъ же свой имать, вѣры розныя благовѣрная и еретическая, изообильна же плодомъ всякпмъ. Есть же и близь того островъ Милитъ не много людей, вѣры розные, и языкъ и нравы Еллинскіе.

     59. Да на томъ же морю стоитъ островъ Троя, нынѣ пустъ, бывало царство славно и храбро, но отъ Елинскихъ Царей разорено. Да близ же того острова Ефесъ славный многолюденъ, нравы же и ученіе Еллинское, вѣра же благочестивая, мало же иные вѣры и ереси, покоренъ же подъ данію Турскаго Царя, и изобиленъ овощемъ и прянымъ зеліемъ. Зде же конецъ третіе части Африкѣ Хамову жребію.

     60. Начнемъ же и о четвертой части, иже новыя земли Америки, на западѣ.

     61. Земля новая островъ Америка великъ въ долготу и въ ширину, что таковаго острова на мори нѣсть пространствомъ, человѣцы же на немъ мало, множествіемъ орѣховъ и мушкатовъ и масличія, человѣцы же дики скитаются и одеваются отъ звѣрей и отъ рыбъ, нынѣ же онѣ покорены Испанскому Королю.

     62. Земля Гроенская, островъ же великій пространенъ и князи многія владѣютъ, вѣра же в нихъ Римская и Нѣмецкая, нравы же имутъ розные, и во свою землю приѣзжихъ мало пускаютъ, есть же у нихъ пристанища и монастырь 1000 черньцовъ Латынскія же вѣры и иныя, а лежитъ тутъ святый апостолъ Фома.

     63. Земля Островъ Амразильскій, человѣцы дики, питаются звѣрми и рыбами, живутъ же самовластно, вѣры же и грамоты нѣсть у нихъ. Есть же и близь того Андалузія, нравы же и житіе тѣхъ же человѣкъ, кто къ нимъ ни приѣдетъ, тому они покорены, а родится у нихъ масличіе и овощевъ на древесехъ много всякихъ.

     64. Островъ новая Ишпанія и другій островъ новая Францыя потому названы тако, что онѣ тѣ Нѣмцы островы нашли и овладѣли и свои крѣпости поставили, и люди для того, что нашли и копаютъ тутъ руду златую и серебряную, мѣди же безъ числа, человѣцы же нѣсть.

     65. Островъ земли Первуасинскія, въ немъ же чековѣцы малоумны, и грамоты нѣсть и вѣры, питаются рыбами и звѣрьми, и есть у нихъ озеро великое, и кругомъ того озера златая руда, и рѣкою проходъ въ море, и даютъ дань Королю Испаньскому златою рудою, къ тому же ѣздятъ к нимъ иные Нѣмцы по ту руду златую и на товары мѣняютъ.

     66. Островъ Ѳларицкое кпяженьство, пространенъ и великъ, вѣры у нихъ и грамоты никакія нѣсть, питаюся звѣрми и овощемъ и рыбами , и торговати || (с. 13) къ никъ ѣздятъ изъ иныхъ Государствъ, и каменія и жемчюгу много у нихъ родится.

     67. Островы конецъ Америки, въ нихъ же человѣцы живутъ и надъ собою ииѣютъ князей, и питаются звѣрми и земными плоды, и ѣздятъ к нимъ изо многихъ государствъ по масло древяное и овощи и пряное зеліе, шафранъ, и мушкатъ, гвоздика, и орѣхи.

     68. Островъ страна Еустралкъ, пространенъ зѣло и великъ на полуденномъ падалія море, обычаи ихъ у нихъ таковый и нравы, въ свою землю вдоль никого испускаютъ, а торгуютъ на пристанищахъ коробельныхъ у моря, имѣютъ надъ собою держателей, и грады и села имѣютъ, и хлѣбъ и овощи родятся, вѣры же у нихъ разные, а благочестивыя нынѣ нѣтъ, здѣже конецъ.

     69. Есть же островъ, словетъ земля темная, есть же тамо и иныя островы пустыя темныя же, по тому словетъ, что туды зимою солнце незаходитъ, что ялись оне за западомъ съ полунощи, а солнце зимою ходитъ на высочайшихъ степенехъ полудню, а лѣтомъ тогда бываетъ солнечнаго свѣта много, а дѣлаютъ онѣ со вѣщами сукна и иныя добрыя паволоки, и купятъ у нихъ во многія страны.

     70. Здѣ же конецъ всѣмъ четыремъ частемъ земли всего свѣта великимъ странамъ и царствомъ и королевствомъ и островомъ великимъ, в коихъ человѣцы житіе имутъ, малыхъ же острововъ и безчеловѣчныхъ не возможно описати, или будетъ гдѣ вдали великого моря Окіяна, человѣкомъ, вся та суть Единому вѣдомо.

     71. Слово совершительное книги козмографіи, в немъ же о воспоминаніи и о разрушеніи царствъ.

     72. Кто хитроумная словесенъ да скажетъ чюдныхъ дѣлъ миротвореніе содѣтеля нашего Бога, иже исперва даде тѣлесемъ чювственнымъ всѣ тѣ солнца, душамъ же свѣтъ умное ученіе книгамъ.

     73. Тако и царскій страхъ строительный на человѣческую чувственную жизнь духовныхъ правителехъ ползу къ желанію душамъ къ небеснымъ восходомъ. Мы же даннаго душевнаго существа красоты низходимъ въ долу влекущимъ и пепельнымъ безсловеснымъ, и бываемъ самоизволеннѣи славѣ , и слабохотне скотскаго естества во свойствѣ, нынѣ же возведемъ очеса мысленный и посмотримъ разумнымъ видѣніемъ, и побесѣдуемъ душевнымъ разсужденіемъ о превращеніи престолъ сильныхъ, еже есть странъ великихъ и державъ преславныхъ. Гдѣ Вавилонъ первый въ славѣ, и Персида многонародная? гдѣ Индея многостяжательна, Ефіопія, и тѣхъ великое пространствѣ со отоцы морскими? гдѣ Асирія Богомъ любивая, въ ней же избранный градъ Іерусалимъ, и Палестина достохвальная из него же изыде Христосъ по плоти и вси Пророцы и Апостоли? гдѣ Антіохія градъ Божій, и обѣтованная гора Синай, || (с. 14) Александрія преименитая? гдѣ многомудрая Афинія, и грады Елинскіе многофилософные? гдѣ Египетъ, и Ливія с Вифайдою, да в нихъ же богоизбранныхъ мужей духоносцевъ со иноки яко песокъ вскряй моря? гдѣ же пресвѣтлый Царьградъ святыхъ тѣлесъ наполненный? гдѣ же и надъ вселенною властвующи Римское владычество с нимиже и Италія и Германія много человѣчная? гдѣ же и благочестивая и спасенная Британійская островы? гдѣ же многоплодъная Болгарія и Сербія и Селунь, и святая гора Афонская, въ ней же иноковъ, яко звѣздъ въ небеси? Вся же сія приснопамятная овіи грады отъ войны разрушеніемъ иніа же опустеніемъ осиротѣша, овіи же обсиловани страха и даньми невѣрныхъ Царей, иніи же аще златокованныя полаты падоша, и души ихъ злопогибельными ересьми повергошася. Оле дивства, о колико зло сила грѣховная! яко нѣкто отъ премудрыхъ приточникъ рече: содрагнуша бо ми ся кости и мозги, иже елея проситъ Пророкъ, кто дастъ главѣ моей воду и очима моима источникъ слезъ; о немощной слабости человѣческія прелести, и лукавныя блудницы, и многомятежныя жизни сея! Но слава премудрому жиздителю Богу устрояющему недовѣдомымъ своимъ судомъ о всякой спасительной человѣческой вещи, иже къ жизни нашего душевнаго естества полезная, о немъ же живемъ и движемся есмы во упованія жизни вѣчныя, аминь.

 

Изъ рукописи 2-й половины XVII вѣка.